భ్రమరాంబాష్టకం - తెలుగు

శ్రీ గురుభ్యోనమః

రవిసుధాకర వహ్నిలోచన రత్నకుండల భూషిణీ

ప్రవిమలంబుగ మమ్మునేలిన భక్తజన చింతామణీ

అవనిజనులకు కొంగు బంగారైన దైవశిఖామణీ

శివుని పట్టపురాణి గుణమణి శ్రీగిరీభ్రమరాంబికా

కలియుగంబున మానవులకును కల్పతరువై యుండవా

వెలయగను శ్రీశిఖరమందున విభవమై విలసిల్లవా

ఆలసింపక భక్తవరులకు అష్టసంపదలీయవా

జిలుగు కుంకుమ కాంతి రేఖల శ్రీగిరీభ్రమరాంబికా

అంగవంగ కళింగ కాశ్మీరాంధ్ర దేశములందునన్

పొంగుచును వరహాట కొంకణ పుణ్యభూములయందునన్

రంగుగా కర్ణాటనాట మారాటదేశములందునన్

శృంగిణీదేశముల వెలసిన శ్రీగిరీభ్రమరాంబికా

అక్షయంబుగ కాశిలోపల అన్నపూర్ణభవానివై

సాక్షిగణపతిఁ గన్నతల్లివి సద్గుణావతి శాంభవీ

మోక్షమొసఁగెడు కనకదుర్గవు మూలకారణశక్తివీ

శిక్షజేతువు ఘోరభవముల శ్రీగిరీభ్రమరాంబికా

ఉగ్రలోచన నటవధూమణి కొప్పుగలిగిన భామినీ

విగ్రహంబుల కెల్ల ఘనమైవెలయు శోభనకారిణీ

అగ్రపీఠమునందువెలసిన ఆగమార్థవిచారిణీ

శీఘ్రముగనే వరములిత్తువు శ్రీగిరీభ్రమరాంబికా

నిగమగోచరణీయ కుందన నిర్మలాంగి నిరంజనీ

మిగుల చక్కని పుష్పకోమలి మీననేత్రదయానిధీ

జగతిలోన ప్రసిద్ధికెక్కిన చంద్రముఖి సీమంతినీ

చిగురుటాకులవంటి పెదవుల శ్రీగిరీభ్రమరాంబికా

సోమశేఖర పల్లవాధరి సుందరీమణిధీమణీ

కోమలాంగి కృపాపయోనిధి కుటిలకుంతలయోగినీ

నామనంబున బాయకుండుమ నగకులేశుని నందినీ

సీమలోన ప్రసిద్ధికెక్కిన శ్రీగిరీభ్రమరాంబికా

భూతనాథుని వామభాగము పొందుగా చేకొంటివా

ఖ్యాతిగను శ్రీశైలమున విఖ్యాతిగానెలకొంటివా

పాతకంబుల బారద్రోలుచు భక్తులను చేకొంటివా

శ్వేతగిరిపై వెలసినట్టి శ్రీగిరీభ్రమరాంబికా

ఎల్లవెలసిన నీప్రభావము విష్ణులోకమునందునన్

పల్లవించెను నీదుభావము బ్రహ్మలోకమునందునన్

తెల్లముగ కైలాసముందున మూడులోకములందునన్

చెల్లునమ్మత్రిలోకవాసిని శ్రీగిరీభ్రమరాంబికా

కరుణశ్రీగిరి మల్లికార్జున దైవరాలభామినీ

కరుణతోమమ్మేలు మెప్పుడుకల్పవృక్షముభంగినీ

వరుసతో నీఅష్టకంబును వ్రాసి చదివినవారికీ

సిరులనిత్తువునెల్లకాలము శ్రీగిరీభ్రమరాంబికా